Haaland do agó atọ̀n devo dile Man City hò Burnley podo agó 6-0 po

Sẹgbe, Whejisun 19, 2023

Haaland (2022)

Anademẹtọ Burnley tọn Vincent Kompany plinu to agbàwhinwlẹn sọta Manchester City to Sibigbe dile Erling Haaland do agó hat trick ṣidopotọ etọn to owhe ehe mẹ to aihun he fó podo agó 6-0 po mẹ nado sẹ adà Pep Guardiola tọn yi adà bọlu-hògbẹ́ ẹnẹ he gbọngodo lẹ tọn to FA Cup mẹ.

Kompany he mọ ale Premier League tọn yi na whla ẹnẹ to owhe widopo ehe e yizan taidi bọlu-hòtọ na Man City yin didọ Kuavọna podo yẹyi po to Bọlugbatẹn Etihad tọn mẹ.

Ṣigba to whenuena aihun lọ bẹjẹeji Man City ma do lẹblanu depope hia na bọlu-hòtọ yetọn dai tọn dile Haaland hẹn diun dọ agó etọn lẹpo to owhe ehe mẹ jẹ 42.

Julian Alvarez lọsu do agó awe bọ Cole Palmer lọsu do agó devo nado hẹn Man City dote na agbàwhinwlẹn Premier League, Champions League podo FA Cup tọn po.

Haaland do agó atọ́n dile RB Leipzig yin zize dlan ohinu podo agó 7-0 po to agbàwhinwlẹn Champions League mẹ to osẹ lọ ṣẹnṣẹn.

Na whla dopo dogọ Bọlu-hòtọ Norway-nu lọ sin bladopọ agó tọn lẹ yin aliglọna gbọn Guardiola dali to whenuena e yin didiọ to nukunwhiwhe pẹvide ehe e do agó atọ̀n etọn godo.

Burnley ko jẹ nupli dile yé to awuwle nado lẹkọ wa Premier League mẹ podo Kompany po to owhe tintan etọn mẹ taidi anademẹtọ yetọn.

Ṣigba adà bọlu-hògbẹ́ nukọntọn to Championship mẹ ko mọ nuhe ye na pehẹ to owhe ehe ja podo nuhe Man City dohia ye po.

Adà jonọ tọnlọ lẹ bẹ aihun lọ jẹeji to alihò dagbe de mẹ ṣigba bo gbọjọ to whenuena Haaland do agó tintan etọn podo alọgọ sọn Alvarez de to nukunwhiwhe 32tọ mẹ.

To madẹnmẹ agó lọ lẹzun awe to whenuena Phil Foden gbá bọlu hlan Haaland nado do agó devo.

Bọlu-hòtọ City tọn he nọ do awu sọha ṣiẹnẹtọ do agó atọ̀ntọ etọn to whenuena ṣọti he Phil Foden gbá lẹkọ wa e de.

Haaland ko do agó-atọ̀n (hat-trick) dopo to e whe gbau aihun ṣidopo to aihun 19 ehe e ko tindo mahẹ te mẹ to Etihad to owhe ehe mẹ.

Nugopipe etọn to ko zẹ Alvarez tọn go na Man City.

Asisa lẹ

• "Haaland hits another hat-trick as Man City thrash Burnley 6-0". — Punch. March 18, 2023
• "Man City 6-0 Burnley: Erling Haaland scores his sixth hat-trick of season in FA Cup rout". — Sky Sports. March 18, 2023